Boyfriend Јeans

Boyfriend jeans се едни од моите најомилени трендови летово. 

Мислам дека машките парчиња облека стојат многу секси на девојка. Особено ако девојката знае да си поигра со нив на најженствен и најсекси можен начин :) 

Кежуал маичка која нема да биде ниту премногу долга, ниту премногу кратка, која ќе биде барем едно бројче поголемо од она кое обично го носите (XS->S, S-M, итн.) и на која ќе има интересен напис или долго ланче. 

Рамни ципелки (како кај Katie Holmes), римјанки (како кај Rachel Bilson), апостолки (како на сликата со Гвинет), интересни италијански The Godfather машки чевли (како на сликата со Whitney Port) или пак сандалки на штикличка би ја заокружиле перфектната летна, наизглед спонтана и многу секси комбинација.

Слични вакви фармерки може да се најдат во Теранова, Котон или Калиопе (но, ако знаете, додајте уште некои местенца каде може да се купат).

Летен шопинг

Сфатив дека ме фати летната треска откако на шопинг по роденденски подароци се вратив дома со неколку подароци од мене, за мене :)

Ми се допаѓа што Скопје го следи трендот на модата. Може да се најдат фармерки-шалвари и панталони-шалвари, маички со тантела на нив и многу фустанчиња со цветни дезени.

Се потрудив да останам при себе и на малку работи не успеав да одолеам :)
Еве кои (клик на нив за поголема резолуција):

Маичка од Котон (во Рамстор)
Цена: 790 МКД
Однапред изгледа многу обично, но затоа одзади е целата со тантела. Одлична е за летниве горештини. Во комбинација со долго сребрено ланче со интересен привезок на него, таа може да изгледа одлично.

        

Гаќички-бикини од Кара (во ГТЦ)
Цена: 69 МКД
Состав: 90% најлон, 10% спандекс
Ги има во различни бои и големини и многу се удобни, посебно за летно време. Би ви препорачала да побрзате да си купите, снемува бројчиња. Мора да прочепкате сами по купчето затоа што вработените таму се многу мрзливи. Чудно нешто, не добив ниту една насмевка иако мене обравчињата ме болеа од смеење :) Тоа е што е!
Купив повеќе и тоа во различни бои. За оние кои носат М, доколку не најдете боичка во големина М, земете или во L или во XL и нема потреба од грижа (ќе ви бидат точни) :)
Убавото кај нив е што нема да оформуваат линија т.е. нема да се оцртуваат на облеката.

                       

Руменило и сенка за очи од Кара (во ГТЦ)
Цена: Руменило 99 МКД, сенка за очи 39 МКД (на попуст)
Не сум користела шминка од Кара. Не знам колку е квалитетна. Одлучив да пробам затоа што цената е многу достапна и нема да ми биде криво ако случајно не ми одговараат на лицето. Имате ли користено шминка оттаму? Што мислите за неа?
Направив и мостра (swatch) за да добиете претстава за палетата на бои. Јас имам малку потемен тен и многу ми се допаѓа како стојат.


Мостра (од лево кон десно): руменило, светло-кафена сенка, темно-кафена сенка за очи.

          

Шопинг reviews

Не знам колку ќе се согласите со мене кога ќе кажам дека девојките не знаат како да негуваат вистински пријателства со други девојки само затоа што помеѓу нив застануваат работи како што се чевлите или штосната маичка која една ќе ја купи, а другата веднаш ќе посака да ја има. ;)

Безвезен пример, ама да, мислам дека знаеме да претераме за ситници и дека многу често зависта и љубомората не можат да се отстранат и си функционираат како вирус во пријателството од кој никако не можеш да се откачиш.

Често наидувам на работи кои се евтинки, неопходни или на попуст/распродажба. Мислам дека нема да биде лошо да ги ставам на блогов и да ги споделам цените/местата/евтините работи со вас.
Би била пресреќна кога сите би си поставувале мислења (reviews) за купените работи, дали вредат, дали не, итн.


Чајче од Виталиа (турбо стартер).
Цена: не сум сигурна, околу 80 ден. (знаев дека ќе заборавам ако не запишам :) )
Место: Во кој било голем маркет, па дури и во самата продавница на Виталиа на Зелено пазарче.
Мислење: Многу, многу добар. Малку е киселкаст, но не знам дали потсвесно или не, делува! Некако сум поенергична, со повеќе елан. Секое утро ќе си направам еден литар од ова чајче и уште еден од антицелулитниот на Good Nature. Се трудам да пијам многу течности, здраво е за организмот, за кожата, за се'.

Турпија за нокти со четири лица :) (не знам како да ја наречам)
Цена: 55 ден.
Место: Големата аптека на Рекорд (никако не ми текнува на името, ама ќе го видам и ќе го запишам следниот пат)
Мислење: Има четири страни (обележани се со бројки од 1 до 4: 1. File; 2. Remove ridges; 3. Buff; 4. Polish & Shine). Многу ми се допадна на почетокот. Ноктите стануваа мазни и полирани/сјајни. Не знам колку знам да ја користам и дали е воопшто до мене ама откако ја користам, ноктите ми станаа покршливи, односно слоевите како да почнаа да се лупат. Ја користи некој оваа турпија? Ќе продолжам да ја користам за да видам дали е воопшто до тоа или до нешто друго.

Антибактериски гел за раце
Цена: 55 ден.
Место: Во која било аптека (јас го купив во онаа големата на Рекорд)
Мислење: Малку потечен од другите кои сум ги имала, но функционира. Има алкохол во него, се чувствува мирисот. Тоа малку ги прави рацете посуви, но обавезно го користам, посебно кога сум на шопинг и фаќам се' и сешто веќе испофаќано од секого и секакви :) Не остава некој посебен мирис после користење (тоа малку ме тера да пробам друг откако ќе го потрошам овој). Ги обожавам оние со убав мирис.

Гумени сандалки од Melissa (модел: Ultragirl slingback)
Цена: 1.480 ден.
Место: Полини во ГТЦ
Вебсајт: http://www.melissaplasticdreams.com/home/macedonia
Сите нивни модели: http://www.polyvore.com/melissa_shoes/shop?brand=Melissa&category_id=41
Мислење: Никогаш претходно не би погледнала гумени чевли (наречени jelly shoes), но овие на бразилскиот бренд Melissa ги посакувам одамна. Дури и Вивијан Вествуд има дизајнирано за нив, но тие модели ги немаше во Полини. Одвнатре не се гумени, само однадвор. Малку се тешки за носење долго време, особено затоа што гумата не се шири и прилагодува на стапалото, туку останува иста. Секое носење ми дава сензација на сефте облечени чевли :) Но, ги обожавам. Изгледаат одлично со што било: фармерка, фустанче, панталона, сукња...се'. Ги имаше во повеќе бои, лилава (многу убава боја ама немав со што да ги носам), златна (одлична за летно време), сина, итн.

Тоа е се' за шопингот тој ден. Земав уште некои ситници, но некако се небитни :) Се надевам ви се допаднаа овие.
Послушајте ме и носете антибактериски гел во ташна, секогаш ќе ви биде од корист.
Тоа е се' за денес.
Имајте убав ден и пишете ако има добри зделки, попусти или интересни летни парчиња низ Скопјето.
Се читкаме наскоро :*

Секојдневен и префинет изглед со обетки

Секојдневен и префинет изглед со обетки или менѓуши (така ги викам јас) :)

Шеткав низ СК и видов дека има мал базар на рачно-изработен накит, точно на улица Македонија. Мммм, наидов на многу убави обетки кои обожавам да ги носам и имам прилично голема колекција од нив. Си купив едни преслатки големи обетки за само 80 ден. Велам само бидејќи рачниот труд на луѓето што ги прават треба да вреди многу повеќе. Не се работи само за специфични материјали и бои на менѓушите, туку и за совршена презентација на нечија бујна креативност. Браво за нив!

Еве како изгледаат моите нови обетки (оние шаренките), но сликав уште два пара други (сребрени/метални и бронзено/метални).

Сакав да го споделам со вас моето мислење дека големите обетки може да бидат многу убав додаток на облеката во секаков стил (обична летна, грациозна за прослава или урбано-трендовска за разно-разни забави).

Јас обожавам да ги носам со косата фатена во високо репче (како што ќе забележите на сликите ;) ) Мислам дека така изгледаат поубаво и обетките и девојките што ги носат, особено оние девојки со срцевидна форма на лице (како што е моето).

Но, направив и фото-компилација со повеќе стилови и начини за носење на обетките. Познати фацки ги носат на најразлични начини и во најразлични кежуал и свечени прилики. Може да ги ѕирнете подолу и да ми кажете што мислите. Дали и како носите менѓуши? Со што најчесто ги комбинирате?

Се надевам ви се допаѓаат фотките, пратете ми линк ако наидете и на други специфични изгледи со нив.

Се гледаме низ град со обетки ;)

Запознајте ги Ден и Шена!

Тој, фотограф.

Таа, уметник.

Кучето, нивното најомилено друштво.

Со години си го замислувам моето идеално живеалиште, но никогаш нема добиено конечна форма. Еднаш е куќа, другпат е стан, па понекогаш дури студио на таванот од некоја зграда во Meat District, во Њујорк.

Но, домот на Ден и Шена ми изгледа како совршена комбинација, направена од сите мои мисловни слајдови кои можат да го претстават секој агол на мојот идеален дом!

Мојот идеален дом е всушност наш, на мене и на мојот драг. Тој ги опфаќа сите сфери од нашиот живот. Полиците со книги како дел од нашиот интелектуален развиток, меката еднобојна постела како дел од нашата интимна блискост, сликата The Kiss од Климт и онаа со два пара дланки и мали стапала од нашите омилени и најмлади уметници (како дел од нашето минато и нашата крв), па дури и керамичките теглички на полицата во кујна, една со планински чај, друга со оној од јасмин, трета со житарици, четврта со тутунот за наргиле со вкус на зелено јаболко, итн.

Домот на Ден и Шена е сличен на оној мојот, во моите мисли. И тие изгледаат среќно, мирно и духовно исполнети. И тие изгледаат како да немаат ниту една грижа на светов, благодарение на таа сигурност во нивните приоритети.

Ова се Ден и Шена во својот дом:

Дрвото е присутно насекаде низ куќата. Таа е направена да изгледа старомодно, со селски елементи кои контрираат на оние модерните, како што е масата со столчиња, па дури и корпата за ѓубре во позадина.

Тоа што е интересно е кујната. Дрвена, старомодна, полна со теглички туршија, домашен џем и прекрасно домашно лепче. Кујна од соништата :)

Спалната е се' што се и самите тие, разиграна, топла и полна со убава енергија.

Како централен дел од нивното засолниште е градината. Покрај прекрасниот базен, тие си посадиле и краставички, тиквички, зелени и црвени мали доматчиња. Епа, преслатко. Секој кој може да си оддели време за хоби кое бара посебна грижа и нега е човек кој е пресреќен во животот и кој знае да ги цени тие мали нешта во животот кои усреќуваат како ништо друго на светот.

Скрол надолу и погледнете ги останатите убавини од нивниот дом, а јас...јас ќе го наполнам стаклениот, огромен сад во центарот на мојот дневен престој со карамели, бајадери и кики. Слатки, затоа што мојот живот е сладок :)

Thanks to: Selby

Колач со вишни a la Cuddlepie

Мњам, мњам :)

Секогаш кога се будам (покрај ритуалот во бањата) следи ритуал со правење турско кафе во кујна, резервирање на фотелјата (it's mine!), пуштање на ТВ и листање на дневните весници на мојот телефон, ѕиркање новости на fb, twitter, yahoo mail i blog.mk, итн. Овојпат, во кујната ме чекаа намирниците на сликата. Моите дома одлучиле да им го направам мојот famous колач во кој сите уживаат, колачот со вишни.
Бидејќи ми беа потребни буквално 10 минути за спремање на колачот, си реков „Зошто па да не?“ :)
Сигурна сум дека има доста варијанти на ова благо задоволство, но еве ја мојата...
Ни требаат следниве состојки:

2 јајца

2 чашки шеќер

1 чашка масло

1 чашка млеко

3 чашки брашно

1 пециво

1 канче вишни

Се мешаат сите заедно. Овојпат (велам овојпат затоа што многу често менувам распоред на состојки) почнав со јајцата, па шеќерот. Мешав, па додадов чашка брашно со пецивото во него (мешав) па млекото (мешав), па маслото (и пак мешав) :), за на крај да ги додадам преостанатите 2 чашки брашно. Јас користев поголем филџан (не чаша), но не би требало да има некоја разлика се’ додека ја користите истата чашка за мерење на сите состојки.
Смесата, течна, но и густа, ја ставив во поголем кружен плех (ми се допаѓа кога тестото е потенко) и над неа ги додадов вишните. Вишните ги купувам замрзнати (во Веро ги продаваат замрзнати во бела кутија со вишни на неа, но и во зелена кеса која мислам дека има повеќе грама вишни). Не е лошо да ги оставите да се одмрзнат пред тоа, не сакате да се стопат во рерната и наместо колач, да испадне кашесто тесто поради водата :)
Совет 1: Вишните знаат да ги обојат прстите и ноктите, а потоа се убиваш од миење со сјај, прашок, сапун итн., но бојата никако нема да излезе. Затоа пред да ги фатам, ставам масло на прстите од двете раце. Тоа помага бојата да не навлезе во кожата, туку да се лизга по неа. После само топла вода и сапунче и суперичка (како да не си имал/а работа со вишни) :)
Го ставаш плехот во претходно загреана рерна, на 220 степени и печеш околу 15-тина минути или се’ додека не добие бронзена боја.

Совет 2: За да се осигураш дека колачот е доволно испечен, земи чачкалица и боцни ja на средина. Извади ја и погледни дали на чачкалицата има останато од смесата за колачот, дали се прилепила. Ако да, врати го во рерна. Ако не, it's done! :)
Откако ќе го извадиш, остави го да се излади. Потоа, нароси му шеќер во прав и voila! Bon apetit! ;)

Постои ли кај нас?

Едноставното е секогаш најубаво, но колку од нас овде го сфаќаме тоа?

Фотографии на: Garance Dore' и Yvan Rodic

Виртуелната во мене

Хахахах...

Деновиве, како единствено засолниште од секојдневниот, понекогаш монотон и исполнет-со-работа живот ми е играта The Sims 3. Не знам колку од вас ја играат, посакувам да имав некоја претстава па да имав и виртуелно другарче кое немаше да ми се смее на моите забеганости :))

Како и да е, како вљубеник во храната, еве ја виртуелната во мене. Следат само неколку screenshots, повеќето го содржат моето хоби (готвењето), но и други аспекти од мојот живот, како постојаното доцнење на работа и мојата другарка која е пицоман како и јас (но, таму се уште не најдов Dal Met Fu или сегашен Пелистер (како преферирате) :)